Poslovne vesti - Makedonija

Оризот се врати во Велешко

Хидросистемот "Лисиче" го врати оризот на полињата во Велешко.

Долгогодишниот проблем со недостиг на вода е решен. Акумулацијата има доволни количества вода за жителите на Велес и за наводнување на плодните ниви по течението на реката Тополка.

Земјоделците од селата Лисиче, Мелница, Голозинци, Еловец и Чашка започнаа со сеидба на оризот. Присуството на водата, која е неопходна за оризот, како и субвенциите, придонесоа површините годинава значително да се зголемат. Ако минатата година беа посеани педесетина, годинава под оваа култура ќе бидат посеани повеќе од 130 хектари.

- Почнав со сеидба на оризот. Вода, која ни беше најголем проблем, има доволно. Лани имав еден хектар и најдов 7,5 тони квалитетен ориз. Го продадов и заработив добри пари. Зедов и субвенции. Годинава површините ги зголемувам на два хектара. Има доста трошоци, но сепак, мислам дека оризот е доходовна, ако не и најдоходовна култура во моментов - вели Тодор Николовски од селото Еловец.

Поголем број од земјоделците на нивите на кои одгледуваа други култури сега го сеат оризот. Велат дека овој регион е мошне погоден за одгледување на оваа култура. Од хектар се собираат од шест до осум тони оризова арпа. И покрај тоа што откупната цена е ниска и изнесува 25 денари за килограм арпа, со богатиот род и со субвенциите, може добро да се заработи.

- Останав без работа. Бев работник во Порцеланка. За да обезбедам егзистенција за моето семејство се вратив на татковото огниште. Ќе посеам ориз и ќе засадам тутун. Знам, нема да се збогатам, но барем ќе обезбедам пари за еден скромен живот. Водата, која со години беше проблем, сега ја има - вели Ангелко Трајковски од селото Лисиче.

Површините под ориз годинава значително ќе се зголемат и во другите населени места по течението на реката Тополка чие корито, со изградбата на браната на ХС "Лисиче", е полно со вода. Земјоделците велат дека сеидбата ќе ја завршат до крајот на овој месец.

Водата од хидросистемот многу придонесе во овој регион покрај оризот, да се зголемат и површините под лозови и овошни насади, потоа под тутун и градинарски култури. Што е најважно, ни рекоа земјоделците, водата го врати животот во селата кои беа пред умирање. Многумина, кои пред повеќе години заминаа, сега, за да си обезбедат егзистениција, повторно се вратија.